من فن الواو لعبده الشنهوري

يا سيد الخلق مدحـــــك
يبعت في قلبي المــسرة

الفرح في القلب يضحك

ويعم كـــــل المــــــجرة

...............................

طول عمرى سابق لجيلي

ولا كلت يا دنــــيا نبقــــك

با اتحمل اللي ياجي لــــي

وآديني ساير في سبقــــك

..............................

قالوا الحوايط ليها ودان

فلا تبوح باللي عملتــــه

وآديني عايش بلا لسـان
وفي نفسي سري كتمتـه

..............................

اللي ما ينفع على الضيق
في الوسع ما أظن ينفــع
لوحتى مــلو الصـــناديق

الكتر مــــــنه ما يشفـــع

.................................

وندهت قالوا عايز مــين

راحوا الأصايل وغابــوا

راحوا وع البعد عازمين

بعد الخسايس ما عابــوا

.............................

النخل طارح بلح شيص

والبحر كاره مضيقــــه

والندل يلعن أبو ابليـس

وف سره يبقى رفيقـــه

.............................

كان ليا صاحب أرى بيه

ويزيدني في الشدة شدة

دلوقتي إبنـــي أربيـــــه

يرميني في وسط شــدة

.............................

زرت اللي لا ود ليهــــم

ومنايا أغير ظنونــــــي

لقيت واطيهم عاليــــهم

ونسيوا مكاني ونسوني

...........................

عدو أهلك عدو ليـــك

ومناه يرقب كروبــــك

لو يام شاهد هلال ليك

يتمنى لحظة غــروبك

.............................

اللي بيصهل مينهــــقش

و لا صقر كان كل حــايم

سرب الحمايم ما ينعقش
و لو كسود الغــــــــمايم
............................
كداب من يعجن الصبر
و لا يدوقش مـــــراره
واللي بإيده حفر قـــبر
لا بد يــــعرف قـــراره
............................